o dil toD ke jaane wale dil ki baat batata ja

o dil toḌ ke jaane vaale dil kī baat batātā jā

ab maiñ dil ko kyā samjhā.ūñ mujh ko bhī samjhātā jā

haañ mere majrūh tabassum ḳhushk laboñ tak aatā jā

phuul kī hast-o-būd yahī hai khiltā jā murjhātā jā

merī chup rahne kī aadat jis kāran bad-nām huī

ab vo hikāyat aam huī hai suntā jā sharmātā jā

ye dukh-dard kī barkhā bande den hai tere daatā kī

shukr-e-ne.amat bhī kartā jā dāman bhī phailātā jā

jiine kā armān karūñ yā marne kā sāmān karūñ

ishq meñ kyā hotā hai nāseh aql kī baat sujhātā jā

tujh ko abr-ālūd dinoñ se kaam na chāñdnī rātoñ se

bahlātā hai bātoñ se bahlātā jā bahlātā jā

donoñ sañg-e-rāh-e-talab haiñ rāh-numā bhī manzil bhī

zauq-e-talab har ek qadam par donoñ ko Thukrātā jā

naġhme se jab phuul khileñge chunñe vaale chun leñge

sunñe vaale sun leñge tū apnī dhun meñ gaatā jā

āḳhir tujh ko bhī maut aa.ī ḳhair 'hafīz' ḳhudā-hāfiz

lekin marte marte pyāre vaj.h-e-marg batātā jā

o dil toD ke jaane wale dil ki baat batata ja

ab main dil ko kya samjhaun mujh ko bhi samjhata ja

han mere majruh tabassum KHushk labon tak aata ja

phul ki hast-o-bud yahi hai khilta ja murjhata ja

meri chup rahne ki aadat jis karan bad-nam hui

ab wo hikayat aam hui hai sunta ja sharmata ja

ye dukh-dard ki barkha bande den hai tere data ki

shukr-e-neamat bhi karta ja daman bhi phailata ja

jine ka arman karun ya marne ka saman karun

ishq mein kya hota hai naseh aql ki baat sujhata ja

tujh ko abr-alud dinon se kaam na chandni raaton se

bahlata hai baaton se bahlata ja bahlata ja

donon sang-e-rah-e-talab hain rah-numa bhi manzil bhi

zauq-e-talab har ek qadam par donon ko Thukraata ja

naghme se jab phul khilenge chunne wale chun lenge

sunne wale sun lenge tu apni dhun mein gata ja

aaKHir tujh ko bhi maut aai KHair 'hafiz' KHuda-hafiz

lekin marte marte pyare wajh-e-marg batata ja