pa-ba-daman ho raha hun bas-ki main sahra-naward

pā-ba-dāman ho rahā huuñ bas-ki maiñ sahrā-navard

ḳhār-e-pā haiñ jauhar-e-ā.īna-e-zānū mujhe

dekhnā hālat mire dil kī ham-āġhoshī ke vaqt

hai nigāh-e-āshnā terā sar-e-har-mū mujhe

huuñ sarāpā sāz-e-āhañg-e-shikāyat kuchh na pūchh

hai yahī behtar ki logoñ meñ na chheḌe tū mujhe

bā.is-e-vāmāndgī hai umr-e-fursat-jū mujhe

kar diyā hai pā-ba-zanjīr-e-ram-e-āhū mujhe

ḳhāk-e-fursat bar-sar-e-zauq-e-fanā ai intizār

hai ġhubār-e-shīsha-e-sā.at ram-e-āhū mujhe

ham-zabāñ aayā nazar fikr-e-suḳhan meñ tū mujhe

mardumuk hai tūtī-e-ā.īna-e-zānū mujhe

yād-e-mizhgāñ meñ ba-nashtar-e-zār-e-saudā-e-ḳhayāl

chāhiye vaqt-e-tapish yak-dast sad-pahlū mujhe

iztirāb-e-umr be-matlab nahīñ āḳhir ki hai

justujū-e-fursat-e-rabt-e-sar-e-zānū mujhe

chāhiye darmān-e-rīsh-e-dil bhī teġh-e-yār se

maram-e-zañgār hai vo vasma-e-abrū mujhe

kasrat-e-jaur-o-sitam se ho gayā huuñ be-dimāġh

ḳhūb-rūyoñ ne banāyā 'ġhālib'-e-bad-ḳhū mujhe

fursat-e-ārām-e-ġhash hastī hai bohrān-e-adam

hai shikast-e-rañg-e-imkāñ gardish-e-pahlū mujhe

sāz-e-īmā-e-fanā hai ālam-e-pīrī 'asad'

qāmat-e-ḳham se hai hāsil shoḳhī-e-abrū mujhe

pa-ba-daman ho raha hun bas-ki main sahra-naward

KHar-e-pa hain jauhar-e-aina-e-zanu mujhe

dekhna haalat mere dil ki ham-aghoshi ke waqt

hai nigah-e-ashna tera sar-e-har-mu mujhe

hun sarapa saz-e-ahang-e-shikayat kuchh na puchh

hai yahi behtar ki logon mein na chheDe tu mujhe

bais-e-wamandgi hai umr-e-fursat-ju mujhe

kar diya hai pa-ba-zanjir-e-ram-e-ahu mujhe

KHak-e-fursat bar-sar-e-zauq-e-fana ai intizar

hai ghubar-e-shisha-e-saat ram-e-ahu mujhe

ham-zaban aaya nazar fikr-e-suKHan mein tu mujhe

mardumuk hai tuti-e-aina-e-zanu mujhe

yaad-e-mizhgan mein ba-nashtar-e-zar-e-sauda-e-KHayal

chahiye waqt-e-tapish yak-dast sad-pahlu mujhe

iztirab-e-umr be-matlab nahin aaKHir ki hai

justuju-e-fursat-e-rabt-e-sar-e-zanu mujhe

chahiye darman-e-rish-e-dil bhi tegh-e-yar se

maram-e-zangar hai wo wasma-e-abru mujhe

kasrat-e-jaur-o-sitam se ho gaya hun be-dimagh

KHub-ruyon ne banaya 'ghaalib'-e-bad-KHu mujhe

fursat-e-aram-e-ghash hasti hai bohran-e-adam

hai shikast-e-rang-e-imkan gardish-e-pahlu mujhe

saz-e-ima-e-fana hai aalam-e-piri 'asad'

qamat-e-KHam se hai hasil shoKHi-e-abru mujhe