pa kar use khone ke guman se bhi gaya main

pā kar use khone ke gumāñ se bhī gayā maiñ

is baar mohabbat meñ ziyāñ se bhī gayā maiñ

sūkhe hue pattoñ pe phisalte haiñ mire paañv

ai rāhat-e-jāñ raqs-e-ḳhizāñ se bhī gayā maiñ

kartā hai koī aur mire dukh kī shikāyat

ye haal hai ḳhud apnī fuġhāñ se bhī gayā maiñ

be-vaqt namāzoñ kā zamāna bhī guzārā

is 'ahd meñ bar-vaqt azaañ se bhī gayā maiñ

phir us se na milne kī qasam khaa.ī ka.ī baar

har baar magar apnī zabāñ se bhī gayā maiñ

raste meñ achānak vo milā hī nahīñ 'āsim'

guzrā huuñ yahāñ se bhī vahāñ se bhī gayā maiñ

pa kar use khone ke guman se bhi gaya main

is bar mohabbat mein ziyan se bhi gaya main

sukhe hue patton pe phisalte hain mere panw

ai rahat-e-jaan raqs-e-KHizan se bhi gaya main

karta hai koi aur mere dukh ki shikayat

ye haal hai KHud apni fughan se bhi gaya main

be-waqt namazon ka zamana bhi guzara

is 'ahd mein bar-waqt azan se bhi gaya main

phir us se na milne ki qasam khai kai bar

har bar magar apni zaban se bhi gaya main

raste mein achanak wo mila hi nahin 'asim'

guzra hun yahan se bhi wahan se bhi gaya main