pabandi-e-auqat-e-dua kis ke liye hai

pābandi-e-auqāt-e-duā kis ke liye hai

rātoñ kī ibādat kā sila kis ke liye hai

haiñ kis ke liye madh-bharī āñkhoñ ke ishāre

gulnār se hoñToñ kī fazā kis ke liye hai

ham log duā deñge tirī zulf-e-siyah ko

mālūm ho ye shahr-e-sabā kis ke liye hai

kyā naam hai us shaḳhs-e-javāñ-baḳht kā ai dost

ḳhalvat kī ye dhīmī sī sadā kis ke liye hai

ḳhvāboñ ke tarab-zār meñ ye kaun milā thā

tanhā.ī meñ tū naġhma-sarā kis ke liye hai

ārā.ish-o-taz.īñ kā ḳhayāl aayā hai kab se

hāthoñ pe ye tahrīr-e-hinā kis ke liye hai

kaun aa.egā ḳhvāboñ ke dhuñdlakoñ se tire paas

āñkhoñ meñ ye paiġhām-e-vafā kis ke liye hai

ai parda-nashīñ sharm-o-hayā ḳhuub hai lekin

āḳhir vo tirī shoḳh adā kis ke liye hai

itnā to batā de tire ma.asūm se dil meñ

ye mahshar-e-jazbāt bapā kis ke liye hai

pabandi-e-auqat-e-dua kis ke liye hai

raaton ki ibaadat ka sila kis ke liye hai

hain kis ke liye madh-bhari aankhon ke ishaare

gulnar se honTon ki faza kis ke liye hai

hum log dua denge teri zulf-e-siyah ko

malum ho ye shahr-e-saba kis ke liye hai

kya nam hai us shaKHs-e-jawan-baKHt ka ai dost

KHalwat ki ye dhimi si sada kis ke liye hai

KHwabon ke tarab-zar mein ye kaun mila tha

tanhai mein tu naghma-sara kis ke liye hai

aaraish-o-tazin ka KHayal aaya hai kab se

hathon pe ye tahrir-e-hina kis ke liye hai

kaun aaega KHwabon ke dhundlakon se tere pas

aankhon mein ye paigham-e-wafa kis ke liye hai

ai parda-nashin sharm-o-haya KHub hai lekin

aaKHir wo teri shoKH ada kis ke liye hai

itna to bata de tere masum se dil mein

ye mahshar-e-jazbaat bapa kis ke liye hai