pabandiyan hain mere hi izhaar par

pābandiyāñ haiñ mere hī iz.hār par

zāġh-o-zaġhan kā shor hai murdār par

tāsīr hai kis ke lahū ko dekhiye

sabza ugā hai āhanī talvār par

dilkash hasīñ poshāk ho yā jism ho

markūz hai merī nazar bāzār par

mere liye koī ḳhabar aatī nahīñ

aur sāmne aḳhbār hai aḳhbār par

mausam ajab hālāt se do-chār hai

bādal nahīñ taa.ir nahīñ ashjār par

dil se jigar se ḳhuun se vāqif kiyā

ehsān hai amrāz kā bīmār par

ye shahr hai yā koī zindāñ kyā kaheñ

'shāhid' yahāñ dīvār hai dīvār par

pabandiyan hain mere hi izhaar par

zagh-o-zaghan ka shor hai murdar par

tasir hai kis ke lahu ko dekhiye

sabza uga hai aahani talwar par

dilkash hasin poshak ho ya jism ho

markuz hai meri nazar bazar par

mere liye koi KHabar aati nahin

aur samne aKHbar hai aKHbar par

mausam ajab haalat se do-chaar hai

baadal nahin tair nahin ashjar par

dil se jigar se KHun se waqif kiya

ehsan hai amraaz ka bimar par

ye shahr hai ya koi zindan kya kahen

'shahid' yahan diwar hai diwar par