painda husn-o-zinat-e-bagh-e-jahan nahin

pā.inda husn-o-zīnat-e-bāġh-e-jahāñ nahīñ

vo kaun sī bahār hai jis ko ḳhizāñ nahīñ

vāqif vo mere haal se maiñ un ke haal se

sharm-o-hayā se guftugū go darmiyāñ nahīñ

us kī nigāh phirte hī sab ham se phir ga.e

vo mehrbāñ nahīñ to koī mehrbāñ nahīñ

ai bāda-nosh piitā hai ḳhalvat meñ chhup ke tū

vo kaun sī jagah hai batā vo jahāñ nahīñ

ulfat kā ye asar hai ki rag rag meñ Tiis hai

maiñ kyā batā.ūñ dard kahāñ hai kahāñ nahīñ

duniyā ho bad-gumān nahīñ is kā ġham mujhe

ai dil hazār shukr ki vo bad-gumāñ nahīñ

painda husn-o-zinat-e-bagh-e-jahan nahin

wo kaun si bahaar hai jis ko KHizan nahin

waqif wo mere haal se main un ke haal se

sharm-o-haya se guftugu go darmiyan nahin

us ki nigah phirte hi sab hum se phir gae

wo mehrban nahin to koi mehrban nahin

ai baada-nosh pita hai KHalwat mein chhup ke tu

wo kaun si jagah hai bata wo jahan nahin

ulfat ka ye asar hai ki rag rag mein Tis hai

main kya bataun dard kahan hai kahan nahin

duniya ho bad-guman nahin is ka gham mujhe

ai dil hazar shukr ki wo bad-guman nahin