پانا تمام عمر ہے کھونا تمام عمر

پانا تمام عمر ہے کھونا تمام عمر

یوںہی لگا رہے گا تماشہ تمام عمر

تم چاہتے تھے ٹھیک ہے لیکن کسی کو بھی

دیکھا کسی کے ساتھ ٹھہرتا تمام عمر

جی چاہتا ہے وقت کی رفتار روک دوں

ٹھہرا رہے یہیں پہ یہ لمحہ تمام عمر

لمحوں کو روکنے کی بھی خواہش عجیب ہے

ٹھہرا کبھی ہے کیا کوئی لمحہ تمام عمر

تم خود بتاؤ یہ بھی کوئی زندگی ہوئی

غیروں کے آشیانوں میں رہنا تمام عمر

خود کو بھی چھوڑ آئے تھے تم بھی نہیں ملے

اب اپنا انتظار رہے گا تمام عمر

بس دشت دشت آبلہ پائی ہوئی نصیب

اب کیا بتائیں جھیلا ہے کیا کیا تمام عمر

ماہیؔ دعا کرو دل بیمار کے لئے

ورنہ جہاں میں دل نہیں لگنا تمام عمر

حق کس طرح ادا ہو ترا اے غم حیات

نوحہ تمام عمر ہو گریہ تمام عمر