pana tamam umr hai khona tamam umr

paanā tamām 'umr hai khonā tamām 'umr

yūñhī lagā rahegā tamāsha tamām 'umr

tum chāhte the Thiik hai lekin kisī ko bhī

dekhā kisī ke saath Thahartā tamām 'umr

jī chāhtā hai vaqt kī raftār rok duuñ

Thahrā rahe yahīñ pe ye lamha tamām 'umr

lamhoñ ko rokne kī bhī ḳhvāhish 'ajīb hai

Thahrā kabhī hai kyā koī lamha tamām 'umr

tum ḳhud batāo ye bhī koī zindagī huī

ġhairoñ ke āshiyānoñ meñ rahnā tamām 'umr

ḳhud ko bhī chhoḌ aa.e the tum bhī nahīñ mile

ab apnā intizār rahegā tamām 'umr

bas dasht dasht ābla-pā.ī huī nasīb

ab kyā batā.eñ jhelā hai kyā kyā tamām 'umr

'māhī' du'ā karo dil-e-bīmār ke liye

varna jahāñ meñ dil nahīñ lagnā tamām 'umr

haq kis tarah adā ho tirā ai ġham-e-hayāt

nauha tamām 'umr ho girya tamām 'umr

pana tamam 'umr hai khona tamam 'umr

yunhi laga rahega tamasha tamam 'umr

tum chahte the Thik hai lekin kisi ko bhi

dekha kisi ke sath Thaharta tamam 'umr

ji chahta hai waqt ki raftar rok dun

Thahra rahe yahin pe ye lamha tamam 'umr

lamhon ko rokne ki bhi KHwahish 'ajib hai

Thahra kabhi hai kya koi lamha tamam 'umr

tum KHud batao ye bhi koi zindagi hui

ghairon ke aashiyanon mein rahna tamam 'umr

KHud ko bhi chhoD aae the tum bhi nahin mile

ab apna intizar rahega tamam 'umr

bas dasht dasht aabla-pai hui nasib

ab kya bataen jhela hai kya kya tamam 'umr

'mahi' du'a karo dil-e-bimar ke liye

warna jahan mein dil nahin lagna tamam 'umr

haq kis tarah ada ho tera ai gham-e-hayat

nauha tamam 'umr ho girya tamam 'umr