pani ki tarah ret ke sine mein utar ja

paanī kī tarah ret ke siine meñ utar jā

yā phir se dhuāñ ban ke ḳhalāoñ meñ bikhar jā

lahrā kisī chhitnār pe o miit havā ke

sūkhe hue pattoñ se dabe paañv guzar jā

chaḌhtī huī is dhuup meñ saaya to Dhalegā

ehsān koī ret kī dīvār pe dhar jā

bujhtī huī ik shab kā tamāshā.ī huuñ maiñ bhī

ai sub.h ke taare mirī palkoñ pe Thahar jā

lahrā.egā ākāsh pe sadiyoñ tirā paikar

ik baar mirī ruuh ke sāñche meñ utar jā

is ban meñ rahā kartī hai parchhā.īñ sadā kī

ai raat ke raahī tū zarā tez guzar jā

us paar chalā hai to 'rashīd' apnā asāsa

behtar hai kisī aañkh kī dahlīz pe dhar jā

pani ki tarah ret ke sine mein utar ja

ya phir se dhuan ban ke KHalaon mein bikhar ja

lahra kisi chhitnar pe o mit hawa ke

sukhe hue patton se dabe panw guzar ja

chaDhti hui is dhup mein saya to Dhalega

ehsan koi ret ki diwar pe dhar ja

bujhti hui ek shab ka tamashai hun main bhi

ai subh ke tare meri palkon pe Thahar ja

lahraega aakash pe sadiyon tera paikar

ek bar meri ruh ke sanche mein utar ja

is ban mein raha karti hai parchhain sada ki

ai raat ke rahi tu zara tez guzar ja

us par chala hai to 'rashid' apna asasa

behtar hai kisi aankh ki dahliz pe dhar ja