pani ko aag kah ke mukar jaana chahiye

paanī ko aag kah ke mukar jaanā chāhiye

palkoñ pe ashk ban ke Thahar jaanā chāhiye

saut-o-suḳhan ke dā.ere tahlīl ho ga.e

qaus-e-nazar se dil meñ utar jaanā chāhiye

ehsās kī zabāñ ko luġhat se nikāl kar

ma.anī kī sarhadoñ se guzar jaanā chāhiye

duniyā kī vus.ateñ haiñ ba-andāza-e-nazar

ye dekhne kā kaam hai kar jaanā chāhiye

tanhā nazar pe kījiye kis dil se e'tibār

dil ko bhī tā-ba-hadd-e-nazar jaanā chāhiye

ġham-hā-e-zindagī se na thā umr bhar farāġh

ab kuchh to zindagī ko sañvar jaanā chāhiye

jā.ūñ kahāñ ki ḳhud mirī rāheñ safar meñ haiñ

rāheñ safar meñ hoñ to kidhar jaanā chāhiye

zanjīr-e-makāñ hai jahāñ husn-e-lā-makāñ

us anjuman meñ bār-e-digar jaanā chāhiye

zamzam harīm-ka.aba meñ hai māmtā kā dil

hai shart-e-zīst Duub ke mar jaanā chāhiye

jaañ ho agar matā-e-talab se azīz-tar

parvānoñ ko charāġh se Dar jaanā chāhiye

yaaro sunā hai aap meñ gum ho gayā 'zafar'

is ḳhānumāñ-ḳharāb ke ghar jaanā chāhiye

pani ko aag kah ke mukar jaana chahiye

palkon pe ashk ban ke Thahar jaana chahiye

saut-o-suKHan ke daere tahlil ho gae

qaus-e-nazar se dil mein utar jaana chahiye

ehsas ki zaban ko lughat se nikal kar

mani ki sarhadon se guzar jaana chahiye

duniya ki wusaten hain ba-andaza-e-nazar

ye dekhne ka kaam hai kar jaana chahiye

tanha nazar pe kijiye kis dil se e'tibar

dil ko bhi ta-ba-hadd-e-nazar jaana chahiye

gham-ha-e-zindagi se na tha umr bhar faragh

ab kuchh to zindagi ko sanwar jaana chahiye

jaun kahan ki KHud meri rahen safar mein hain

rahen safar mein hon to kidhar jaana chahiye

zanjir-e-makan hai jahan husn-e-la-makan

us anjuman mein bar-e-digar jaana chahiye

zamzam harim-kaba mein hai mamta ka dil

hai shart-e-zist Dub ke mar jaana chahiye

jaan ho agar mata-e-talab se aziz-tar

parwanon ko charagh se Dar jaana chahiye

yaro suna hai aap mein gum ho gaya 'zafar'

is KHanuman-KHarab ke ghar jaana chahiye