پاؤں چادر سے نکل جائے نہ باہر میرا

پاؤں چادر سے نکل جائے نہ باہر میرا

مجھ کو اوقات میں رکھتا ہے یہی ڈر میرا

کھول دیتا ہے قفس باندھ کے وہ پنکھ مرے

یوں بھی ڈھاتا ہے ستم مجھ پہ ستمگر میرا

چھوٹے کمرے تھے مگر تھا بڑا آنگن جس کا

میرے سپنوں میں بہت آتا ہے وہ گھر میرا

سلوٹیں پائی ہیں چہرے کی گنوا کر اک عمر

چھین پائے گا نہ اب وقت یہ زیور میرا

رات کو رات کہوں دن کو کہوں دن ہی میں

راس آیا نہ زمانے کو یہ تیور میرا

آپ اچھے ہیں تو سب لوگ ملیں گے اچھے

ٹوٹ جاتا ہے صفرؔ وہم یہ اکثر میرا