panw chadar se nikal jae na bahar mera

paañv chādar se nikal jaa.e na bāhar merā

mujh ko auqāt meñ rakhtā hai yahī Dar merā

khol detā hai qafas bāñdh ke vo pankh mire

yuuñ bhī Dhātā hai sitam mujh pe sitamgar merā

chhoTe kamre the magar thā baḌā āñgan jis kā

mere sapnoñ meñ bahut aatā hai vo ghar merā

silvaTeñ paa.ī haiñ chehre kī gañvā kar ik 'umr

chhīn pā.egā na ab vaqt ye zevar merā

raat ko raat kahūñ din ko kahūñ din hī maiñ

raas aayā na zamāne ko ye tevar merā

aap achchhe haiñ to sab log mileñge achchhe

Tuut jaatā hai 'sifar' vahm ye aksar merā

panw chadar se nikal jae na bahar mera

mujh ko auqat mein rakhta hai yahi Dar mera

khol deta hai qafas bandh ke wo pankh mere

yun bhi Dhata hai sitam mujh pe sitamgar mera

chhoTe kamre the magar tha baDa aangan jis ka

mere sapnon mein bahut aata hai wo ghar mera

silwaTen pai hain chehre ki ganwa kar ek 'umr

chhin paega na ab waqt ye zewar mera

raat ko raat kahun din ko kahun din hi main

ras aaya na zamane ko ye tewar mera

aap achchhe hain to sab log milenge achchhe

Tut jata hai 'sifar' wahm ye aksar mera