پاؤں پھیلاتی ہیں وہ تا سر داماں کیا کیا

پاؤں پھیلاتی ہیں وہ تا سر داماں کیا کیا

ناز کرتے ہیں مرے چاک گریباں کیا کیا

یاد دنداں میں تمہارے جو حیا سے رویا

اشک نے منہ کو چھپایا تہ داماں کیا کیا

دامن‌ دشت میں سو بار وطن سے مجھ کو

کھینچ لائی کشش خار بیاباں کیا کیا

غنچۂ دل سے تہہ خنجر براں قاتل

بوئے گل بن کے نکل جائیں گے ارماں کیا کیا

لطف اٹھنے نہیں دیتا ہے ہم آغوشی کا

ہو شب وصل میں خوف شب ہجراں کیا کیا

شادیٔ قتل سے تھا شوق تبسم مجھ کو

صورت زخم تہہ خنجر براں کیا کیا

نہ کھلا عقدۂ گیسوۓ صنم وائے نصیب

دست تدبیر تھکے ہو کے پشیماں کیا کیا

ناز سے خنجر قاتل کی طرح مقتل میں

میری گردن سے لپٹتا ہے گریباں کیا کیا

روز گھٹ جاتا ہے کچھ ہمت ممسک کی طرح

تنگ کرتا ہے مجھے گوشۂ زنداں کیا کیا

کوئی دریا انہیں کہتا ہے کوئی بارش ابر

دھوکے دیتے ہیں مرے دیدۂ گریاں کیا کیا

روزہ داران محبت سے حیا کرتی ہے

شام گیسو صفت صبح غریباں کیا کیا

سن کے کچھ میری پریشانیٔ تقدیر کا حال

بن کے بگڑی ہے تری زلف پریشاں کیا کیا

لب ملا کر لب خنجر سے ترے او قاتل

مسکراتے ہیں شگاف دل نالاں کیا کیا

پوچھتے کیا ہو شگفتہؔ چمن عالم میں

کیا کہوں میں کہ ہے بے رحمیٔ خوباں کیا کیا