papon ki man mein oDh ke poshak raat-din

pāpoñ kī man meñ oḌh ke poshāk rāt-din

kis shaan se chamaktī hai ye ḳhaak rāt-din

dil kā sukūn le ke vo jaane kahāñ gayā

taktā phire hai dīda-e-namnāk rāt-din

gul kī tarah zarā se tabassum ke vāste

kartī hai ziist kaise qabā chaak rāt-din

ye bhī hai ek raaz ki khātā hai pech-o-tāb

apne hī dām-e-vahm meñ idrāk rāt-din

phūloñ kā rang dekh ke ai kushta-e-ḳhizāñ

bulbul kī tarh kar na jigar chaak rāt-din

āshob-e-dahr se to amaañ mil ga.ī magar

ik shor sā rahe hai tah-e-ḳhāk rāt-din

'parkāsh' dil kā dard hai dil meñ abhī talak

kyoñ gūñjtā hai gumbad-e-aflāk rāt-din

papon ki man mein oDh ke poshak raat-din

kis shan se chamakti hai ye KHak raat-din

dil ka sukun le ke wo jaane kahan gaya

takta phire hai dida-e-namnak raat-din

gul ki tarah zara se tabassum ke waste

karti hai zist kaise qaba chaak raat-din

ye bhi hai ek raaz ki khata hai pech-o-tab

apne hi dam-e-wahm mein idrak raat-din

phulon ka rang dekh ke ai kushta-e-KHizan

bulbul ki tarh kar na jigar chaak raat-din

aashob-e-dahr se to aman mil gai magar

ek shor sa rahe hai tah-e-KHak raat-din

'parkash' dil ka dard hai dil mein abhi talak

kyon gunjta hai gumbad-e-aflak raat-din