pas apne koi chaara hi na tha

paas apne koī chārā hī na thā

jo hamārā hai hamārā hī na thā

dil ko aisī chāhateñ matlūb thiiñ

jin pe koī haq hamārā hī na thā

ham se ye bhī faisle sarzad hue

jo gavārā thā gavārā hī na thā

aañkh meñ rakhte bhī kyā vo āsmāñ

jis meñ koī chāñd-tārā hī na thā

is liye duniyā se pīchhe rah ga.e

ham ne apnā dil sañvārā hī na thā

ham to sar ke bal chale aate 'rafī.a'

aap ne ham ko pukārā hī na thā

pas apne koi chaara hi na tha

jo hamara hai hamara hi na tha

dil ko aisi chahaten matlub thin

jin pe koi haq hamara hi na tha

hum se ye bhi faisle sarzad hue

jo gawara tha gawara hi na tha

aankh mein rakhte bhi kya wo aasman

jis mein koi chand-tara hi na tha

is liye duniya se pichhe rah gae

hum ne apna dil sanwara hi na tha

hum to sar ke bal chale aate 'rafia'

aap ne hum ko pukara hi na tha