پاس آداب مے کشی رکھنا

پاس آداب مے کشی رکھنا

خود کو تم محو تشنگی رکھنا

ہر کسی سے نہ دوستی رکھنا

دوستوں سے نہ دشمنی رکھنا

گل نہ سارے چراغ ہو جائیں

ایک دو میں تو روشنی رکھنا

لاکھ خوشیاں نصیب ہوں تم کو

غم سے وابستہ زندگی رکھنا

دل کی گرمی نہ سرد ہو جائے

آگ سینے میں کچھ دبی رکھنا

ختم رشتہ تو کر رہے ہو مگر

کچھ تعلق کبھی کبھی رکھنا

صرف تقدیر ہی نہیں سب کچھ

دل میں تدبیر بھی کوئی رکھنا

بات سے بھی تو بات بنتی ہے

بات بگڑے تو تم بنی رکھنا

فوقؔ جینے کو یہ ضروری ہے

کچھ نہ کچھ شغل شاعری رکھنا