pas-e-adab mujhe unhen sharm-o-haya na ho

pās-e-adab mujhe unheñ sharm-o-hayā na ho

nazzāra-gāh meñ asar-e-mā-sivā na ho

maanā mirī qubūl nahīñ hai duā na ho

itnā hī ho ki us pe asar ġhair kā na ho

kyuuñ kar kahūñ ki paas unheñ ġhair kā na ho

jo ġhusse meñ bhī kahte haiñ terā burā na ho

is parde meñ to kitne girebān chaak haiñ

vo be-hijāb hoñ to ḳhudā jaane kyā na ho

takiye meñ kyā rakhā hai ḳhat-e-ġhair kī tarah

dekhūñ to maiñ navishta-e-qismat mirā na ho

mil kar gale vo karte haiñ ḳhanjar kī tarah kaaT

is par bhī kah rahā huuñ ki mujh se judā na ho

muusā kā haal dekh ke dil kāñpne lagā

ab to duā hai un se mirā sāmnā na ho

vo baar baar merā lipaTnā shab-e-visāl

un kā jhijak ke kahnā koī dekhtā na ho

'bedam' kī zindagī hai isī chheḌ-chhāḌ meñ

tark-e-vafā kī tarah se tark-e-jafā na ho

pas-e-adab mujhe unhen sharm-o-haya na ho

nazzara-gah mein asar-e-ma-siwa na ho

mana meri qubul nahin hai dua na ho

itna hi ho ki us pe asar ghair ka na ho

kyun kar kahun ki pas unhen ghair ka na ho

jo ghusse mein bhi kahte hain tera bura na ho

is parde mein to kitne gireban chaak hain

wo be-hijab hon to KHuda jaane kya na ho

takiye mein kya rakha hai KHat-e-ghair ki tarah

dekhun to main nawishta-e-qismat mera na ho

mil kar gale wo karte hain KHanjar ki tarah kaT

is par bhi kah raha hun ki mujh se juda na ho

musa ka haal dekh ke dil kanpne laga

ab to dua hai un se mera samna na ho

wo bar bar mera lipaTna shab-e-visal

un ka jhijak ke kahna koi dekhta na ho

'bedam' ki zindagi hai isi chheD-chhaD mein

tark-e-wafa ki tarah se tark-e-jafa na ho