pas mein ruh-e-wafa ho jaise

paas meñ rūh-e-vafā ho jaise

dil mirā jaltā diyā ho jaise

is tarah jiitā huuñ maiñ tere baġhair

zindagī ek sazā ho jaise

lab pe yuuñ naam tirā aatā hai

āḳhir-e-shab kī duā ho jaise

dil mirā toḌā hai hañste hañste

ye tirā ahd-e-vafā ho jaise

yuuñ terī mast nazar uThtī hai

dar mai-ḳhāna khulā ho jaise

pal meñ murjhā ke girā shāḳh se phuul

muskurāne kī sazā ho jaise

ġham milā terā lipaT kar mujh se

yār-e-derīna milā ho jaise

uf ye aalam tirī añgḌā.ī kā

gul ho aur mauj-e-sabā ho jaise

dil meñ aa.ī hai tirī yaad 'habīb'

shāḳh meñ phuul khilā ho jaise

pas mein ruh-e-wafa ho jaise

dil mera jalta diya ho jaise

is tarah jita hun main tere baghair

zindagi ek saza ho jaise

lab pe yun nam tera aata hai

aaKHir-e-shab ki dua ho jaise

dil mera toDa hai hanste hanste

ye tera ahd-e-wafa ho jaise

yun teri mast nazar uThti hai

dar mai-KHana khula ho jaise

pal mein murjha ke gira shaKH se phul

muskurane ki saza ho jaise

gham mila tera lipaT kar mujh se

yar-e-derina mila ho jaise

uf ye aalam teri angDai ka

gul ho aur mauj-e-saba ho jaise

dil mein aai hai teri yaad 'habib'

shaKH mein phul khila ho jaise