paya tere kushton ne jo maidan-e-bayaban

paayā tire kushtoñ ne jo maidān-e-bayābāñ

shān-e-chaman-e-ḳhuld huī shān-e-bayābāñ

dīvāna tirā mar ke huā zinda-e-jāved

ruuh us kī jo niklī to huī jān-e-bayābāñ

mujh sā bhī jahāñ meñ koī saudā.ī na hogā

samjhā lahad-e-qais ko aivān-e-bayābāñ

vīrāna-nashīnī hai azal se mirī jāgīr

qismat ne diyā hai mujhe farmān-e-bayābāñ

vahshat pe mirī āhūoñ ke bahte haiñ aañsū

hairat pe mirī rote haiñ haivān-e-bayābāñ

hai ālam-e-hū turbat-e-majnūñ kā mujāvar

sannāTe kā aalam hai nigahbān-e-bayābāñ

jis roz mire hosh ke ham-rāh uḌeñge

dam toḌ ke mar jā.eñge murġhān-e-bayābāñ

ik din hī ye mauqūf huā ḳhaak kā uḌnā

kyā kyā na kiyā qais ne sāmān-e-bayābāñ

parvā na thī bastī kī na thī yaad vatan kī

allāh re mad-hoshī-o-nisyān-e-bayābāñ

rahte haiñ mire gird parī-zād hazāroñ

huuñ ālam-e-vahshat meñ sulaimān-e-bayābāñ

lailā pe jo aalam hai to majnūñ bhī hai ḳhush-rū

vo hūr-e-bayābāñ hai vo ġhilmān-e-bayābāñ

is tabqe kī manzūr jo kī tum ne tabāhī

barbādī huī dast-o-garebān-e-bayābāñ

afsos hai is najd ko majnūñ ne basāyā

lailā jise kahtī hai bayābān-e-bayābāñ

dil khol ke jī chāhtā hai ḳhaak uḌā.ūñ

phirne ko milā hai mujhe maidān-e-bayābāñ

jis din se banī hai tire dīvāne kī turbat

hote haiñ parī-zād bhī qurbān-e-bayābāñ

sheroñ ke hilā Daale haiñ dil us ke junūñ ne

majnūñ hai ki hai rustam-e-dastān-e-bayābāñ

jis vaqt 'sharaf' lailā o majnūñ ne qazā kī

ik ġhul huā ruḳhsat hue mehmān-e-bayābāñ

paya tere kushton ne jo maidan-e-bayaban

shan-e-chaman-e-KHuld hui shan-e-bayaban

diwana tera mar ke hua zinda-e-jawed

ruh us ki jo nikli to hui jaan-e-bayaban

mujh sa bhi jahan mein koi saudai na hoga

samjha lahad-e-qais ko aiwan-e-bayaban

virana-nashini hai azal se meri jagir

qismat ne diya hai mujhe farman-e-bayaban

wahshat pe meri aahuon ke bahte hain aansu

hairat pe meri rote hain haiwan-e-bayaban

hai aalam-e-hu turbat-e-majnun ka mujawar

sannaTe ka aalam hai nigahban-e-bayaban

jis roz mere hosh ke ham-rah uDenge

dam toD ke mar jaenge murghan-e-bayaban

ek din hi ye mauquf hua KHak ka uDna

kya kya na kiya qais ne saman-e-bayaban

parwa na thi basti ki na thi yaad watan ki

allah re mad-hoshi-o-nisyan-e-bayaban

rahte hain mere gird pari-zad hazaron

hun aalam-e-wahshat mein sulaiman-e-bayaban

laila pe jo aalam hai to majnun bhi hai KHush-ru

wo hur-e-bayaban hai wo ghilman-e-bayaban

is tabqe ki manzur jo ki tum ne tabahi

barbaadi hui dast-o-gareban-e-bayaban

afsos hai is najd ko majnun ne basaya

laila jise kahti hai bayaban-e-bayaban

dil khol ke ji chahta hai KHak uDaun

phirne ko mila hai mujhe maidan-e-bayaban

jis din se bani hai tere diwane ki turbat

hote hain pari-zad bhi qurban-e-bayaban

sheron ke hila Dale hain dil us ke junun ne

majnun hai ki hai rustam-e-dastan-e-bayaban

jis waqt 'sharaf' laila o majnun ne qaza ki

ek ghul hua ruKHsat hue mehman-e-bayaban