paDh ke qasid KHat mera us bad-zaban ne kya kaha

paḌh ke qāsid ḳhat mirā us bad-zabāñ ne kyā kahā

kyā kahā phir kah but-e-nā-mehrbāñ ne kyā kahā

ġhair se milnā tumhārā sun ke go ham chup rahe

par sunā hogā ki tum ko ik jahāñ ne kyā kahā

gāliyoñ kī jhaaḌ bāñdhī qasd-e-sargoshī meñ raat

kyā kahā chāhe thā maiñ us bad-gumāñ ne kyā kahā

sab ḳhirāj-e-misr de kar thā zuleḳhā ko ye soch

mol yūsuf se pisar kā kārvāñ ne kyā kahā

aah ai murġh-e-chaman kuchh tū bhī vāqif hai ki sub.h

gul ne kyā pūchhā thā hañs kar bāġhbāñ ne kyā kahā

phir lahū Tapke hai pyāre aaj kuchh bātoñ ke biich

sach kaho lab se tumhāre rañg-e-pān ne kyā kahā

'qā.em' us kūche se shab ġhamgīñ na aatā thā yūñhī

kyā kahūñ tujh se ki us ko pāsbāñ ne kyā kahā

paDh ke qasid KHat mera us bad-zaban ne kya kaha

kya kaha phir kah but-e-na-mehrban ne kya kaha

ghair se milna tumhaara sun ke go hum chup rahe

par suna hoga ki tum ko ek jahan ne kya kaha

galiyon ki jhaD bandhi qasd-e-sargoshi mein raat

kya kaha chahe tha main us bad-guman ne kya kaha

sab KHiraj-e-misr de kar tha zuleKHa ko ye soch

mol yusuf se pisar ka karwan ne kya kaha

aah ai murgh-e-chaman kuchh tu bhi waqif hai ki subh

gul ne kya puchha tha hans kar baghban ne kya kaha

phir lahu Tapke hai pyare aaj kuchh baaton ke bich

sach kaho lab se tumhaare rang-e-pan ne kya kaha

'qaem' us kuche se shab ghamgin na aata tha yunhi

kya kahun tujh se ki us ko pasban ne kya kaha