paDha hai humne sabaq har ghaDi sadaqat ka

paḌhā hai ham ne sabaq har ghaḌī sadāqat kā

isī liye to ye ham par asar hai rahmat kā

maiñ sach ko jhuuT kī botal meñ band kar lūñgā

mire gale meñ bhī tā'vīz hai siyāsat kā

mirī nigāh bhalā kyoñ na ho muqaddas-tar

maiñ roz kartā huuñ dīdār apnī jannat kā

maiñ bach gayā huuñ mirā naam ġhāziyoñ meñ likho

irāda kar ke to niklā thā maiñ shahādat kā

jabīn-e-shauq ke sajdoñ kā lutf yā-allāh

vo marhala bhī ajab thā tirī rifāqat kā

abhī talak hai taḳhayyul meñ nuur kī bārish

ḳhayāl aayā thā ik din tumhārī mid.hat kā

lo aaj vaqt kī Thokar meñ aa ga.e haiñ 'navāb'

nasha thā jin ke dimāġhoñ meñ bādshāhat kā

paDha hai hum ne sabaq har ghaDi sadaqat ka

isi liye to ye hum par asar hai rahmat ka

main sach ko jhuT ki botal mein band kar lunga

mere gale mein bhi ta'wiz hai siyasat ka

meri nigah bhala kyon na ho muqaddas-tar

main roz karta hun didar apni jannat ka

main bach gaya hun mera nam ghaziyon mein likho

irada kar ke to nikla tha main shahadat ka

jabin-e-shauq ke sajdon ka lutf ya-allah

wo marhala bhi ajab tha teri rifaqat ka

abhi talak hai taKHayyul mein nur ki barish

KHayal aaya tha ek din tumhaari midhat ka

lo aaj waqt ki Thokar mein aa gae hain 'nawab'

nasha tha jin ke dimaghon mein baadshahat ka