paDin ye kis ke jalwe par nigahen

paḌīñ ye kis ke jalve par nigāheñ

nigāheñ ban ga.iiñ ḳhud jalva-gāheñ

kahe mujh se na koī zabt-e-ġham ko

abhī muñh se nikal jā.eñgī aa.heñ

sulūk apnā hai un ke naqsh-e-pā par

yahī haiñ manzil-e-irfāñ kī rāheñ

unheñ dekheñ vo dekheñ yā na dekheñ

unheñ chāheñ vo chāheñ yā na chāheñ

chalā.e the jinhoñ ne tiir dil par

ham āñkhoñ meñ liye haiñ vo nigāheñ

natīja hai ye aa.heñ khīñchne kā

hameñ khīñche liye phirtī haiñ aa.heñ

'sharaf' kis ne ye Daalī aañkh meñ aañkh

nigāhoñ se nikal aa.iiñ nigāheñ

paDin ye kis ke jalwe par nigahen

nigahen ban gain KHud jalwa-gahen

kahe mujh se na koi zabt-e-gham ko

abhi munh se nikal jaengi aahen

suluk apna hai un ke naqsh-e-pa par

yahi hain manzil-e-irfan ki rahen

unhen dekhen wo dekhen ya na dekhen

unhen chahen wo chahen ya na chahen

chalae the jinhon ne tir dil par

hum aankhon mein liye hain wo nigahen

natija hai ye aahen khinchne ka

hamein khinche liye phirti hain aahen

'sharaf' kis ne ye Dali aankh mein aankh

nigahon se nikal aain nigahen