pahaDon se abhi nikla nahin tha

pahāḌoñ se abhī niklā nahīñ thā

maiñ dariyā thā magar gahrā nahīñ thā

ayaañ hotā kisī par raaz kyūñ-kar

abhī vo vaqt hī aaya nahīñ thā

sar-e-maqtal mire hī tazkire the

magar maiñ ġhaar se lauTā nahīñ thā

haram thā muntazir sadiyoñ se jis kā

vo koī but-shikan aaya nahīñ thā

ajab andāz kā thā ilm merā

kisī ke fahm meñ aatā nahīñ thā

maiñ aise bhes meñ bastī se guzrā

kisī ne mujh ko pahchānā nahīñ thā

shab-e-hijrat bahut ḳhadshe the lekin

zamāna niiñd se jaagā nahīñ thā

kuchh aisī raushnī chhā.ī huī thī

kisī ko kuchh nazar aatā nahīñ thā

yahī pahchān thī 'āsif' hamārī

hamāre paas ā.īna nahīñ thā

pahaDon se abhi nikla nahin tha

main dariya tha magar gahra nahin tha

ayan hota kisi par raaz kyun-kar

abhi wo waqt hi aaya nahin tha

sar-e-maqtal mere hi tazkire the

magar main ghaar se lauTa nahin tha

haram tha muntazir sadiyon se jis ka

wo koi but-shikan aaya nahin tha

ajab andaz ka tha ilm mera

kisi ke fahm mein aata nahin tha

main aise bhes mein basti se guzra

kisi ne mujh ko pahchana nahin tha

shab-e-hijrat bahut KHadshe the lekin

zamana nind se jaga nahin tha

kuchh aisi raushni chhai hui thi

kisi ko kuchh nazar aata nahin tha

yahi pahchan thi 'asif' hamari

hamare pas aaina nahin tha