pahan ke pairahan-e-gul saba nikalti hai

pahan ke pairahan-e-gul sabā nikaltī hai

siyāhiyoñ ke jigar se ziyā nikaltī hai

kabhī to mujh ko bhī ehsās-e-āshnā.ī de

vo raushnī jo kaf-e-gul pe jā nikaltī hai

maiñ aañkh band karūñ to bhī hai vahī manzar

vo ek shakl har ik rū pe aa nikaltī hai

sarāb-e-fahm se aage kahīñ hai bahr-e-murād

har ek manzil-e-dil naqsh-e-pā nikaltī hai

kabhī jo khul ke karūñ baat apne aap se maiñ

har ek aarzū ġham-āshnā nikaltī hai

hujūm-e-aks meñ chehra talāsh kaise kareñ

har ek shakl asās-e-ḳhalā nikaltī hai

sarak rahe haiñ añdhere har ek bastī se

azāb-e-abr se qurs-e-vafā nikaltī hai

mire yaqīñ kī ghuTan aur bhī baḌhe 'nāhīd'

havā ho band to mauj-e-balā nikaltī hai

pahan ke pairahan-e-gul saba nikalti hai

siyahiyon ke jigar se ziya nikalti hai

kabhi to mujh ko bhi ehsas-e-ashnai de

wo raushni jo kaf-e-gul pe ja nikalti hai

main aankh band karun to bhi hai wahi manzar

wo ek shakl har ek ru pe aa nikalti hai

sarab-e-fahm se aage kahin hai bahr-e-murad

har ek manzil-e-dil naqsh-e-pa nikalti hai

kabhi jo khul ke karun baat apne aap se main

har ek aarzu gham-ashna nikalti hai

hujum-e-aks mein chehra talash kaise karen

har ek shakl asas-e-KHala nikalti hai

sarak rahe hain andhere har ek basti se

azab-e-abr se qurs-e-wafa nikalti hai

mere yaqin ki ghuTan aur bhi baDhe 'nahid'

hawa ho band to mauj-e-bala nikalti hai