pahchan ka asasa wo jab haar aaega

pahchān kā asāsa vo jab haar aa.egā

chehre na.e ḳharīdne bāzār aa.egā

rañgoñ ke qāfile nahīñ ab mere ham-safar

hamrāh ek barg-e-azzā-dār aa.egā

nāmūs-e-sub.h-e-karbalā apnī ridā sambhāl

chal kar abhī to shaam kā darbār aa.egā

dīvār o dar meñ der se sargoshiyāñ sī haiñ

fāteh qabīloñ kā koī sardār aa.egā

maftūh bastiyoñ pe hai yalġhār kī ghaḌī

galiyoñ meñ ek lashkar-e-jarrār aa.egā

maiñ sañg-e-rah nahīñ jo uThā kar tū pheñk de

maiñ aisā marhala huuñ jo sau baar aa.egā

bachche javān ho ga.e nā-tāqatī ke saath

kab bāzuoñ meñ zor-e-alamdār aa.egā

pahchan ka asasa wo jab haar aaega

chehre nae KHaridne bazar aaega

rangon ke qafile nahin ab mere ham-safar

hamrah ek barg-e-azza-dar aaega

namus-e-subh-e-karbala apni rida sambhaal

chal kar abhi to sham ka darbar aaega

diwar o dar mein der se sargoshiyan si hain

fateh qabilon ka koi sardar aaega

maftuh bastiyon pe hai yalghaar ki ghaDi

galiyon mein ek lashkar-e-jarrar aaega

main sang-e-rah nahin jo uTha kar tu phenk de

main aisa marhala hun jo sau bar aaega

bachche jawan ho gae na-taqati ke sath

kab bazuon mein zor-e-alamdar aaega