pahchan kam hui na shanasai kam hui

pahchān kam huī na shanāsā.ī kam huī

baaqī hai zaḳhm zaḳhm kī gahrā.ī kam huī

sulgā huā hai ziist kā sahrā ufuq ufuq

chehroñ kī dilkashī ga.ī zebā.ī kam huī

duurī kā dasht jis ke liye sāzgār thā

āñgan meñ qurb ke vo shanāsā.ī kam huī

ab shahr shahr aam hai goyā.ī kā sukūt

jab se lab-e-sukūt kī goyā.ī kam huī

kuchh ho na ho ḳhamoshī-e-ā.īna se magar

parchhā.iyoñ kī ma.arka-ārā.ī kam huī

har rañg zindagī hai tah-e-gard-o-rozgār

tasvīr kī vo raunaq-o-ra.anā.ī kam huī

ik ajnabī dayār meñ guzre haiñ din magar

ye kam nahīñ ḳhulūs kī rusvā.ī kam huī

'rāhī' rafāqatoñ kā ye anjām dekh kar

saa.e ke saath apnī shanāsā.ī kam huī

pahchan kam hui na shanasai kam hui

baqi hai zaKHm zaKHm ki gahrai kam hui

sulga hua hai zist ka sahra ufuq ufuq

chehron ki dilkashi gai zebai kam hui

duri ka dasht jis ke liye sazgar tha

aangan mein qurb ke wo shanasai kam hui

ab shahr shahr aam hai goyai ka sukut

jab se lab-e-sukut ki goyai kam hui

kuchh ho na ho KHamoshi-e-aina se magar

parchhaiyon ki marka-arai kam hui

har rang zindagi hai tah-e-gard-o-rozgar

taswir ki wo raunaq-o-ranai kam hui

ek ajnabi dayar mein guzre hain din magar

ye kam nahin KHulus ki ruswai kam hui

'rahi' rafaqaton ka ye anjam dekh kar

sae ke sath apni shanasai kam hui