pahle dukh dard kai dil mein sambhaale maine

pahle dukh dard ka.ī dil meñ sambhāle maiñ ne

phir kiyā ḳhud ko tire ġham ke havāle maiñ ne

kyuuñ khule tujh pe safar meñ thī azīyat kaisī

kab dikhā.e haiñ tujhe ruuh ke chhāle maiñ ne

tū ne har gaam jo baḳhshe haiñ añdhere mujh ko

un añdheroñ meñ tire ḳhvāb ujāle maiñ ne

terī tasvīr mire paas thī ya.anī tū thā

din tire hijr ke is ḳhvāb meñ Taale maiñ ne

tere ġham se kiyā duniyā ke ġhamoñ kā chāra

yaanī ik ḳhaar se sab ḳhaar nikāle maiñ ne

shahr vāloñ ne inheñ abr-e-karam samjhā naaz

apne aañsū jo havāoñ meñ uchhāle maiñ ne

pahle dukh dard kai dil mein sambhaale main ne

phir kiya KHud ko tere gham ke hawale main ne

kyun khule tujh pe safar mein thi aziyat kaisi

kab dikhae hain tujhe ruh ke chhaale main ne

tu ne har gam jo baKHshe hain andhere mujh ko

un andheron mein tere KHwab ujale main ne

teri taswir mere pas thi yani tu tha

din tere hijr ke is KHwab mein Tale main ne

tere gham se kiya duniya ke ghamon ka chaara

yani ek KHar se sab KHar nikale main ne

shahr walon ne inhen abr-e-karam samjha naz

apne aansu jo hawaon mein uchhaale main ne