pahle hum uski mahfil mein jaane se katrae to

pahle ham us kī mahfil meñ jaane se katrā.e to

lekin kyā kiije jab dil kī shāmat hī aa jaa.e to

is jhagḌe meñ ham-sāyoñ kī daḳhl-andāzī vājib hai

buniyādī mauzūa yahī thā jaag paḌe ham-sā.e to

ġhazloñ meñ rañgīnī laane kī bābat phir sochūñgā

pahle ye batlā do us ne chhup kar tiir chalā.e to

ḳhud milne kī ḳhvāhish karnā albatta manzūr nahīñ

vaise ham kam-zarf nahīñ haiñ vo zahmat farmā.e to

apnā haq hāsil karne kī ḳhātir maiñ bhī chaltā huuñ

merā terā saath na hogā haath agar phailā.e to

us kī ḳhaslat bhāñp chukā huuñ bāteñ hañs kar Tālegā

aur yaqīnan baat banegī bātoñ par jhallā.e to

log 'muzaffar'-hanafī ko bhī pābandī se paḌhte haiñ

chiknī-chapḌī ġhazleñ paḌhte paḌhte jī uktā.e to

pahle hum us ki mahfil mein jaane se katrae to

lekin kya kije jab dil ki shamat hi aa jae to

is jhagDe mein ham-sayon ki daKHl-andazi wajib hai

buniyaadi mauzua yahi tha jag paDe ham-sae to

ghazlon mein rangini lane ki babat phir sochunga

pahle ye batla do us ne chhup kar tir chalae to

KHud milne ki KHwahish karna albatta manzur nahin

waise hum kam-zarf nahin hain wo zahmat farmae to

apna haq hasil karne ki KHatir main bhi chalta hun

mera tera sath na hoga hath agar phailae to

us ki KHaslat bhanp chuka hun baaten hans kar Talega

aur yaqinan baat banegi baaton par jhallae to

log 'muzaffar'-hanafi ko bhi pabandi se paDhte hain

chikni-chapDi ghazlen paDhte paDhte ji uktae to