pahle jo thi dilon mein mohabbat nahin rahi

pahle jo thī diloñ meñ mohabbat nahīñ rahī

afsos ab jahāñ meñ sharāfat nahīñ rahī

ik mehrbāñ kī chashm-e-karam mujh pe ho ga.ī

duniyā tire karam kī zarūrat nahīñ rahī

tum ne nigāh pherī to ehsās ye huā

duniyā meñ kuchh ḳhulūs kī qīmat nahīñ rahī

ye aur baat maiñ ne hī tujh ko bhulā diyā

hamrāh mere kab tirī rahmat nahīñ rahī

kyoñ aap kā.enāt se bezār ho ga.e

kyā dil meñ raushnī-e-mohabbat nahīñ rahī

manzil se āshnā vo kabhī ho nahīñ sakā

hāsil jise kisī kī qayādat nahīñ rahī

maiñ ne kisī kā dil nahīñ toḌā kabhī 'anā'

vallāh mujh meñ ye kabhī aadat nahīñ rahī

pahle jo thi dilon mein mohabbat nahin rahi

afsos ab jahan mein sharafat nahin rahi

ek mehrban ki chashm-e-karam mujh pe ho gai

duniya tere karam ki zarurat nahin rahi

tum ne nigah pheri to ehsas ye hua

duniya mein kuchh KHulus ki qimat nahin rahi

ye aur baat main ne hi tujh ko bhula diya

hamrah mere kab teri rahmat nahin rahi

kyon aap kaenat se bezar ho gae

kya dil mein raushni-e-mohabbat nahin rahi

manzil se aashna wo kabhi ho nahin saka

hasil jise kisi ki qayaadat nahin rahi

main ne kisi ka dil nahin toDa kabhi 'ana'

wallah mujh mein ye kabhi aadat nahin rahi