pahle kiya gaya mujhe yakta-e-rang-o-bu

pahle kiyā gayā mujhe yaktā-e-rañg-o-bū

phir rañj kī tahoñ meñ utārā gayā mujhe

to iztirāb meñ hī liyā hogā merā naam

varna kabhī sukūñ meñ pukārā gayā mujhe

māthe pe likh diyā gayā us ḳhush-adā kā hijr

aur hijr ke darūñ meñ sañvārā gayā mujhe

pairoñ ko roktī rahī āvāz-e-raftagāñ

sahrā-e-ḳhāk-o-ḳhūñ meñ utārā gayā mujhe

ab mujh meñ DhūñDhiye na nishāñ shahr-e-zāt kā

hijrat ke rauzanoñ meñ nithārā gayā mujhe

is se bhī dil kā saath koī der hī rahā

jis ḳhvāb ke fusūñ meñ utārā gayā mujhe

vo shahr-e-sar-nigūñ ki jahāñ dil kahe jise

us shahr-e-sar-nigūñ meñ sañvārā gayā mujhe

pahle kiya gaya mujhe yakta-e-rang-o-bu

phir ranj ki tahon mein utara gaya mujhe

to iztirab mein hi liya hoga mera nam

warna kabhi sukun mein pukara gaya mujhe

mathe pe likh diya gaya us KHush-ada ka hijr

aur hijr ke darun mein sanwara gaya mujhe

pairon ko rokti rahi aawaz-e-raftagan

sahra-e-KHak-o-KHun mein utara gaya mujhe

ab mujh mein DhunDhiye na nishan shahr-e-zat ka

hijrat ke rauzanon mein nithaara gaya mujhe

is se bhi dil ka sath koi der hi raha

jis KHwab ke fusun mein utara gaya mujhe

wo shahr-e-sar-nigun ki jahan dil kahe jise

us shahr-e-sar-nigun mein sanwara gaya mujhe