pahle lagta tha bin tere mar jaunga

pahle lagtā thā bin tere mar jā.ūñgā

tū ne chhoḌā to phir maiñ kidhar jā.ūñgā

tū bhī lagtā hai mujh ko zamāne sā hī

tere dil se bhī ik din utar jā.ūñgā

terī aadat ne mujh ko bigāḌā hai par

ek din dekhnā maiñ sudhar jā.ūñgā

phir tire paas se dekhnā kaise maiñ

tujh ko dekhe binā hī guzar jā.ūñgā

aaj bātoñ meñ huuñ terī nazroñ meñ huuñ

jald dil meñ tire ho amar jā.ūñgā

terī nazar-e-karam kī hī bas der hai

ye jo bigḌā huā huuñ sañvar jā.ūñgā

us kī yādeñ raheñgī mire saath saath

shahr ye chhoḌ kar ab agar jā.ūñgā

ek din chhoḌ ye ġham-zadoñ kā jahāñ

ban maiñ guzrī purānī ḳhabar jā.ūñgā

ban ke bādal havāoñ ke sang uḌ ke maiñ

DhūñDne tujh ko har ik nagar jā.ūñgā

kyā kahā tujh ko mujh par bharosa nahīñ

tujh ko lagtā hai ki maiñ mukar jā.uñgā

huuñ mohabbat mohabbat mohabbat huuñ maiñ

terā dil to nahīñ huuñ jo bhar jā.ūñgā

aaj ḳhushbū mirī hogī kal chhāñv bhī

phuul huuñ aaj kal ban shajar jā.ūñgā

pahle lagta tha bin tere mar jaunga

tu ne chhoDa to phir main kidhar jaunga

tu bhi lagta hai mujh ko zamane sa hi

tere dil se bhi ek din utar jaunga

teri aadat ne mujh ko bigaDa hai par

ek din dekhna main sudhar jaunga

phir tere pas se dekhna kaise main

tujh ko dekhe bina hi guzar jaunga

aaj baaton mein hun teri nazron mein hun

jald dil mein tere ho amar jaunga

teri nazar-e-karam ki hi bas der hai

ye jo bigDa hua hun sanwar jaunga

us ki yaaden rahengi mere sath sath

shahr ye chhoD kar ab agar jaunga

ek din chhoD ye gham-zadon ka jahan

ban main guzri purani KHabar jaunga

ban ke baadal hawaon ke sang uD ke main

DhunDne tujh ko har ek nagar jaunga

kya kaha tujh ko mujh par bharosa nahin

tujh ko lagta hai ki main mukar jaunga

hun mohabbat mohabbat mohabbat hun main

tera dil to nahin hun jo bhar jaunga

aaj KHushbu meri hogi kal chhanw bhi

phul hun aaj kal ban shajar jaunga