پہلے صحرا سے مجھے کھینچ کے لایا گیا ہے

پہلے صحرا سے مجھے کھینچ کے لایا گیا ہے

اور پھر شہر میں لے جا کے بسایا گیا ہے

یعنی ہر وقت ہی موجود وہ رہتا ہے یہاں

یعنی وہ لوٹ کے آیا ہے تو سایا گیا ہے

بے سبب رہتا نہیں ہے وہ ہمیشہ بے چین

اس کی مرضی کے بغیر اس کو بنایا گیا ہے

حسن خود آرا کی تصویر بنانے کے لئے

رنگ کچھ میری نظر سے بھی چرایا گیا ہے

کھو گیا ہوں میں کہیں شہر کے شور و غل میں

ڈھونڈنے کے لئے صحرا کو بلایا گیا ہے

انہیں اطراف میں سنتے ہیں ہوا تھا وہ گم

انہیں اطراف میں سنتے ہیں وہ پایا گیا ہے

کس نے سورج کا سفر روک کے رکھا ہوا تھا

میرے آنگن سے بہت دیر میں سایا گیا ہے