پہلے سوچا نہیں جاؤں گا پر گیا ہوں مری راہبہ

پہلے سوچا نہیں جاؤں گا پر گیا ہوں مری راہبہ

کام جو تھے نہیں ہو رہے کر گیا ہوں مری راہبہ

اک دیا رکھ کے آیا ہوں میں تیرے معبد کی دیوار پر

اور ترے نام کا تیل بھی بھر گیا ہوں مری راہبہ

کچھ حواری تری پشت پر زخم کرتے دکھائی دئے

سچ کہوں تو میں اس خواب سے ڈر گیا ہوں مری راہبہ

طے کیا تھا خداوند کو پہلی فرصت میں ڈھونڈوں مگر

میں تجھے ڈھونڈتے ڈھونڈتے مر گیا ہوں مری راہبہ

پھر کلیسا کے برگد تلے آج کا دن گزارا گیا

آج پھر رات کو دیر سے گھر گیا ہوں مری راہبہ