pahle to mujh mein hashr bapa kar diya gaya

pahle to mujh meñ hashr bapā kar diyā gayā

aur phir badan ko nazr-e-sabā kar diyā gayā

kāñToñ kī baaḌ par thā gulāboñ kā pairāhan

phūloñ ko ḳhār-o-ḳhas kī qabā kar diyā gayā

māñgī jo maiñ ne vasl kī lazzat to ye kahā

ki tujh ko dard-e-hijr atā kar diyā gayā

jab jab use pukārā kaḌī dhuup meñ lagā

saaya sā jaise mujh pe ghanā kar diyā gayā

ik baar hī to chamkā thā mujh meñ tirā vajūd

phir aks terā mujh se judā kar diyā gayā

kyā phir havā-e-marg chalī hai dayār meñ

kyā shahr-e-ārzū ko fanā kar diyā gayā

jaanā thā lā-makāñ kī mujhe sair ko 'sahar'

achchhā huā badan se rihā kar diyā gayā

pahle to mujh mein hashr bapa kar diya gaya

aur phir badan ko nazr-e-saba kar diya gaya

kanTon ki baD par tha gulabon ka pairahan

phulon ko KHar-o-KHas ki qaba kar diya gaya

mangi jo main ne wasl ki lazzat to ye kaha

ki tujh ko dard-e-hijr ata kar diya gaya

jab jab use pukara kaDi dhup mein laga

saya sa jaise mujh pe ghana kar diya gaya

ek bar hi to chamka tha mujh mein tera wajud

phir aks tera mujh se juda kar diya gaya

kya phir hawa-e-marg chali hai dayar mein

kya shahr-e-arzu ko fana kar diya gaya

jaana tha la-makan ki mujhe sair ko 'sahar'

achchha hua badan se riha kar diya gaya