pahle to na thi itni tab-o-tab ghazal mein

pahle to na thī itnī tab-o-tāb ġhazal meñ

kaam aa ga.ī ġham-ḳhvārī-e-ahbāb ġhazal meñ

dil par se tire ġham kā abhī abr chhaTā hai

chamkā hai tirī yaad kā mahtāb ġhazal meñ

yāroñ ko kisī taur bhī nashsha nahīñ hotā

jab tak ki na shāmil ho mai-e-nāb ġhazal meñ

jis se ḳhalish-e-dard kā āġhāz huā hai

raqsāñ hai vahī paikar-e-sīmāb ġhazal meñ

har misra-e-tar taḳhta-e-gulzār kī sūrat

rañgoñ kī hai ik vādī-e-shādāb ġhazal meñ

go dard ke iz.hār kī aadat to nahīñ thī

piinā hī paḌā ham ko ye zahr-āb ġhazal meñ

asnāf-e-suḳhan aur bhī ai dost bahut haiñ

rañgīñ hai mirī ziist kā har baab ġhazal meñ

pahle to na thi itni tab-o-tab ghazal mein

kaam aa gai gham-KHwari-e-ahbab ghazal mein

dil par se tere gham ka abhi abr chhaTa hai

chamka hai teri yaad ka mahtab ghazal mein

yaron ko kisi taur bhi nashsha nahin hota

jab tak ki na shamil ho mai-e-nab ghazal mein

jis se KHalish-e-dard ka aaghaz hua hai

raqsan hai wahi paikar-e-simab ghazal mein

har misra-e-tar taKHta-e-gulzar ki surat

rangon ki hai ek wadi-e-shadab ghazal mein

go dard ke izhaar ki aadat to nahin thi

pina hi paDa hum ko ye zahr-ab ghazal mein

asnaf-e-suKHan aur bhi ai dost bahut hain

rangin hai meri zist ka har bab ghazal mein