pahle to rasm-o-rah baDhata chala gaya

pahle to rasm-o-rāh baḌhātā chalā gayā

phir aa.ine se jaan chhuḌātā chalā gayā

kal to havā kī ek bhī chalne na dī ga.ī

kuchh ism paḌh ke diip jalātā chalā gayā

hālāñki ab kī baar bahut musta’id thā maiñ

lekin vo ḳhvāb ḳhvāb dikhātā chalā gayā

ye vasf nāgavār hai us ke ḳhayāl kā

aayā jo ek baar to aatā chalā gayā

pahle to ik tavīl ġhazal likh ke phaaḌ dī

phir us kā jashn-o-sog manātā chalā gayā

ḳhud ko girā girā ke uThāyā gayā bahut

ḳhud ko uThā uThā ke girātā chalā gayā

dariyā ko ek ghūñT meñ piine kī chaah thī

'tāsif' ḳhud apnī pyaas baḌhātā chalā gayā

pahle to rasm-o-rah baDhata chala gaya

phir aaine se jaan chhuData chala gaya

kal to hawa ki ek bhi chalne na di gai

kuchh ism paDh ke dip jalata chala gaya

haalanki ab ki bar bahut musta’id tha main

lekin wo KHwab KHwab dikhata chala gaya

ye wasf nagawar hai us ke KHayal ka

aaya jo ek bar to aata chala gaya

pahle to ek tawil ghazal likh ke phaD di

phir us ka jashn-o-sog manata chala gaya

KHud ko gira gira ke uThaya gaya bahut

KHud ko uTha uTha ke giraata chala gaya

dariya ko ek ghunT mein pine ki chah thi

'tasif' KHud apni pyas baDhata chala gaya