پہلے تو ذکر گردش آیام آ گیا

پہلے تو ذکر گردش آیام آ گیا

پھر دوستوں کے لب پہ مرا نام آ گیا

سورج کہاں سے آج سر شام آ گیا

کہہ کر یہ بات کوئی لب بام آ گیا

ہوگی کسی کو عیش جوانی کی کچھ خبر

اپنے تو سر پہ مفت کا الزام آ گیا

کرنا پڑے گا وعدۂ فردا وفا تمہیں

ضد پر اگر مرا دل ناکام آ گیا

شکر حصول دانہ کرے بھی تو کیا کرے

وہ طائر حزیں جو تہ دام آ گیا

پہنچا تھا ان کی بزم میں دل تو بصد امید

کیا جانے کس خیال سے ناکام آ گیا

سن کر جناب شیخ سے توبہ کے فائدے

ہر رند کو خیال مئے و جام آ گیا

کرنی تو تھی شکایت درد جگر مجھے

بے اختیار لب پہ ترا نام آ گیا

اے مرغ دل بتا تو سہی اس کا کیا علاج

دانے سے پیشتر ہی اگر دام آ گیا

برباد کر گئی تری پہلی نظر مجھے

آغاز ہی میں سامنے انجام آ گیا

ساحرؔ جو ذکر شعر و سخن چھڑ گیا کہیں

ہر شخص کی زباں پہ ترا نام آ گیا