pahle ye jism jalaya jae

pahle ye jism jalāyā jaa.e

ba.ad meñ shok manāyā jaa.e

us kī nazroñ meñ agar aanā hai

us kī bātoñ meñ na aayā jaa.e

ab to gardan pe hī ban aa.ī hai

ab to nazroñ ko uThāyā jaa.e

kis ko har shai se mohabbat hai bhalā

kis ko ā.īna banāyā jaa.e

vo jo aa.e na bulāyā jaa.e

vo na aa.e jo bulāyā jaa.e

aisī bāteñ jo sikhāne kī nahīñ

aisī bātoñ ko sikhāyā jaa.e

dil meñ baaqī haiñ abhī ummīdeñ

kyuuñ jigar kaam meñ laayā jaa.e

jis ko ab bhī ho siyāsat pe yaqīn

us ko ye mulk dikhāyā jaa.e

vaqt ke saath na ye chal paayā

ab ḳhudā phir se banāyā jaa.e

pahle ye jism jalaya jae

baad mein shok manaya jae

us ki nazron mein agar aana hai

us ki baaton mein na aaya jae

ab to gardan pe hi ban aai hai

ab to nazron ko uThaya jae

kis ko har shai se mohabbat hai bhala

kis ko aaina banaya jae

wo jo aae na bulaya jae

wo na aae jo bulaya jae

aisi baaten jo sikhane ki nahin

aisi baaton ko sikhaya jae

dil mein baqi hain abhi ummiden

kyun jigar kaam mein laya jae

jis ko ab bhi ho siyasat pe yaqin

us ko ye mulk dikhaya jae

waqt ke sath na ye chal paya

ab KHuda phir se banaya jae