pahle zara muhasba-e-zat bhi to ho

pahle zarā muhāsba-e-zāt bhī to ho

duniyā paḌī hai ghar se shurūāt bhī to ho

samjhe haiñ sab anā ke dhuñdalke ko raushnī

sham.eñ kahāñ jalā.ūñ kahīñ raat bhī to ho

pinhāñ hai āñsuoñ meñ surāġh-e-shaguft-e-gul

sahrā-e-be-zamīr meñ barsāt bhī to ho

ik mas.ale ke baa'd nayā mas.ala hai roz

kuchh mo'atabar ye gardish-e-hālāt bhī to ho

chehre se dil kā haal paḌheñ aur ro bhī leñ

jis se mile haiñ us se mulāqāt bhī to ho

mushkil nahīñ havāoñ meñ jalne lageñ charāġh

shab-zād rāstoñ meñ tirā saath bhī to ho

maiñ tabsira karūñ na ḳhudā kī zamīn par

Thokar lage binā guzar-auqāt bhī to ho

lamhoñ kī muTThiyoñ meñ hai sadiyoñ kī raushnī

lekin nazar meñ vaqt kī auqāt bhī to ho

pahle zara muhasba-e-zat bhi to ho

duniya paDi hai ghar se shuruat bhi to ho

samjhe hain sab ana ke dhundalke ko raushni

shamen kahan jalaun kahin raat bhi to ho

pinhan hai aansuon mein suragh-e-shaguft-e-gul

sahra-e-be-zamir mein barsat bhi to ho

ek masale ke ba'd naya masala hai roz

kuchh mo'atabar ye gardish-e-haalat bhi to ho

chehre se dil ka haal paDhen aur ro bhi len

jis se mile hain us se mulaqat bhi to ho

mushkil nahin hawaon mein jalne lagen charagh

shab-zad raston mein tera sath bhi to ho

main tabsira karun na KHuda ki zamin par

Thokar lage bina guzar-auqat bhi to ho

lamhon ki muTThiyon mein hai sadiyon ki raushni

lekin nazar mein waqt ki auqat bhi to ho