pahli nigah mein hi wo dil mein utar gaya

pahlī nigāh meñ hī vo dil meñ utar gayā

phir us ke ba.ad dil meñ jo kuchh thā bikhar gayā

ma.alūm to karo vo parī-zād kaun hai

ā.īna jis ko dekh ke itnā nikhar gayā

vo shaḳhs jis pe maiñ ne luTā dī hai zindagī

mehmān ghaḌī bhar kā thā jaane kidhar gayā

phir us ke ba.ad kyā huā kyā kyā nahīñ huā

bas tum kisī ke ho ga.e aur maiñ bikhar gayā

ye bhī na dastaras meñ thā vo bhī na thā mirā

qaabū se dil kabhī to kabhī phir jigar gayā

zālim hai tāza-dam maiñ pashemān huuñ bahut

mere lahū ke qatroñ se zālim nikhar gayā

'faisal' hai ḳhauf ḳhud mujhe aise patā chalā

dekhā jo ā.īna to maiñ ḳhud se hī Dar gayā

pahli nigah mein hi wo dil mein utar gaya

phir us ke baad dil mein jo kuchh tha bikhar gaya

malum to karo wo pari-zad kaun hai

aaina jis ko dekh ke itna nikhar gaya

wo shaKHs jis pe main ne luTa di hai zindagi

mehman ghaDi bhar ka tha jaane kidhar gaya

phir us ke baad kya hua kya kya nahin hua

bas tum kisi ke ho gae aur main bikhar gaya

ye bhi na dastaras mein tha wo bhi na tha mera

qabu se dil kabhi to kabhi phir jigar gaya

zalim hai taza-dam main pasheman hun bahut

mere lahu ke qatron se zalim nikhar gaya

'faisal' hai KHauf KHud mujhe aise pata chala

dekha jo aaina to main KHud se hi Dar gaya