pahlu ke aar-par guzarta hua sa ho

pahlū ke ār-pār guzartā huā sā ho

ik shaḳhs aa.ine meñ utartā huā sā ho

jiitā huā sā ho kabhī martā huā sā ho

ik shahr apne aap se Dartā huā sā ho

saare kabīra aap hī kartā huā sā ho

ilzām dūsre hī pe dhartā huā sā ho

har ik nayā ḳhayāl jo Tapke hai zehn se

yuuñ lag rahā hai jaise ki bartā huā sā ho

qailūla kar rahe hoñ kisī niim ke tale

maidāñ meñ raḳhsh-e-umr bhī chartā huā sā ho

ma.ashūq aisā DhūñDiye qahtur-rijāl meñ

har baat meñ agartā magartā huā sā ho

phir ba.ad meñ vo qatl bhī kar de to harj kyā

lekin vo pahle pyaar bhī kartā huā sā ho

gar daad tū na de na sahī gāliyāñ sahī

apnā bhī koī aib hunartā huā sā ho

pahlu ke aar-par guzarta hua sa ho

ek shaKHs aaine mein utarta hua sa ho

jita hua sa ho kabhi marta hua sa ho

ek shahr apne aap se Darta hua sa ho

sare kabira aap hi karta hua sa ho

ilzam dusre hi pe dharta hua sa ho

har ek naya KHayal jo Tapke hai zehn se

yun lag raha hai jaise ki barta hua sa ho

qailula kar rahe hon kisi nim ke tale

maidan mein raKHsh-e-umr bhi charta hua sa ho

mashuq aisa DhunDiye qahtur-rijal mein

har baat mein agarta magarta hua sa ho

phir baad mein wo qatl bhi kar de to harj kya

lekin wo pahle pyar bhi karta hua sa ho

gar dad tu na de na sahi galiyan sahi

apna bhi koi aib hunarta hua sa ho