pahlu na dukhega to guzara nahin hoga

pahlū na dukhegā to guzārā nahīñ hogā

ham sā bhī koī dard kā maarā nahīñ hogā

har she'r hai tasvīr mire zaḳhm-e-jigar kī

haañ dekh ki phir aisā nazārā nahīñ hogā

tū sab kī sune hai kabhī merī bhī ġhazal sun

phir aisā ḳhush-uslūb dobārā nahīñ hogā

jis dard se ham tujh ko diyā karte haiñ āvāz

bulbul ne bhī yuuñ gul ko pukārā nahīñ hogā

kal hogī agar aaj pareshāñ nahīñ hogī

vo zulf jise ham ne sañvārā nahīñ hogā

shamshīr kabhī vaqt kī chal hī nahīñ saktī

jab tak tirī chitvan kā ishārā nahīñ hogā

jab tark-e-ta'alluq kā sitam jhel chuke ham

phir kaun sā ġham hai jo gavārā nahīñ hogā

duniyā meñ mirī jaan ke dushman to bahut haiñ

tum jaise ho aisā koī pyārā nahīñ hogā

ham ko koī ummīd zamāne se nahīñ hai

jo terā huā hai vo hamārā nahīñ hogā

pahlu na dukhega to guzara nahin hoga

hum sa bhi koi dard ka mara nahin hoga

har she'r hai taswir mere zaKHm-e-jigar ki

han dekh ki phir aisa nazara nahin hoga

tu sab ki sune hai kabhi meri bhi ghazal sun

phir aisa KHush-uslub dobara nahin hoga

jis dard se hum tujh ko diya karte hain aawaz

bulbul ne bhi yun gul ko pukara nahin hoga

kal hogi agar aaj pareshan nahin hogi

wo zulf jise hum ne sanwara nahin hoga

shamshir kabhi waqt ki chal hi nahin sakti

jab tak teri chitwan ka ishaara nahin hoga

jab tark-e-ta'alluq ka sitam jhel chuke hum

phir kaun sa gham hai jo gawara nahin hoga

duniya mein meri jaan ke dushman to bahut hain

tum jaise ho aisa koi pyara nahin hoga

hum ko koi ummid zamane se nahin hai

jo tera hua hai wo hamara nahin hoga