pahna ho bar mein jama mera gul-ezar surKH

pahnā ho bar meñ jaama mirā gul-ezār surḳh

aa.ī hai kyā maze se chaman meñ bahār surḳh

jab se girā hai ḳhuun shahīdāñ kā ḳhaak par

tab se huā hai josh-e-gul-e-lāla-zār surḳh

maiñ ḳhvāb meñ huā huuñ ham-āġhosh-e-gul-badan

kyā dekhtā huuñ sub.h ko haigā kanār surḳh

yaañ lag bahe hai ḳhuun mire ashk-e-chashm se

bahte haiñ ab ke saal meñ sab jūebār surḳh

maqtūl jo ki dast-e-hinā-band se huā

rakhtā bajā hai qabr pe sang-e-mazār surḳh

gul kā ḳhajil ho rang pasīne meñ bah gayā

gul-rū ke aks-e-ruḳh se haiñ ab ābshār surḳh

ḳhūn-e-jigar kā haal 'fatavvat' maiñ jab likhā

mistar kā ho gayā hai har ik taar taar surḳh

pahna ho bar mein jama mera gul-ezar surKH

aai hai kya maze se chaman mein bahaar surKH

jab se gira hai KHun shahidan ka KHak par

tab se hua hai josh-e-gul-e-lala-zar surKH

main KHwab mein hua hun ham-aghosh-e-gul-badan

kya dekhta hun subh ko haiga kanar surKH

yan lag bahe hai KHun mere ashk-e-chashm se

bahte hain ab ke sal mein sab juebar surKH

maqtul jo ki dast-e-hina-band se hua

rakhta baja hai qabr pe sang-e-mazar surKH

gul ka KHajil ho rang pasine mein bah gaya

gul-ru ke aks-e-ruKH se hain ab aabshaar surKH

KHun-e-jigar ka haal 'fatawwat' main jab likha

mistar ka ho gaya hai har ek tar tar surKH