پہنا ہو بر میں جامہ مرا گلعذار سرخ

پہنا ہو بر میں جامہ مرا گلعذار سرخ

آئی ہے کیا مزے سے چمن میں بہار سرخ

جب سے گرا ہے خون شہیداں کا خاک پر

تب سے ہوا ہے جوش گل لالہ زار سرخ

میں خواب میں ہوا ہوں ہم آغوش گل بدن

کیا دیکھتا ہوں صبح کو ہے گا کنار سرخ

یاں لگ بہے ہے خون مرے اشک چشم سے

بہتے ہیں اب کے سال میں سب جوئبار سرخ

مقتول جو کہ دست حنا بند سے ہوا

رکھتا بجا ہے قبر پہ سنگ مزار سرخ

گل کا خجل ہو رنگ پسینے میں بہہ گیا

گل رو کے عکس رخ سے ہیں اب آبشار سرخ

خون جگر کا حال فتوتؔ میں جب لکھا

مسطر کا ہو گیا ہے ہر اک تار تار سرخ