pahron baiTha ye sochta hun

pahroñ baiThā ye sochtā huuñ

maiñ bhī kisī dard kī davā huuñ

sīmāb nahīñ magar huuñ muztar

mahshar nahīñ phir bhī maiñ bapā huuñ

soī huī qaum kā huuñ rahbar

sote meñ azaan de rahā huuñ

pahle guzrā hai mujh se farhād

yuuñ kah do mujhe ki dūsrā huuñ

rasta sunsān ho na jaa.e

maiñ is liye kāñTe bo rahā huuñ

jag biit chuke magar abhī tak

ḳhud apnī talāsh meñ lagā huuñ

kaun us ko sune sivā.e mere

maiñ apnī shikast kī sadā huuñ

har shaḳhs mujh ko dekhtā hai

duniyā bhar kā maiñ mājrā huuñ

koī to mile ḳhushī kā sāthī

ā.īne meñ muskurā rahā huuñ

hai chashm-ba-rāh kaun merā

yārab maiñ kis kā aasrā huuñ

jab dekhiye jal rahā huuñ 'arshī'

kyā maiñ kisī laakh kā diyā huuñ

pahron baiTha ye sochta hun

main bhi kisi dard ki dawa hun

simab nahin magar hun muztar

mahshar nahin phir bhi main bapa hun

soi hui qaum ka hun rahbar

sote mein azan de raha hun

pahle guzra hai mujh se farhad

yun kah do mujhe ki dusra hun

rasta sunsan ho na jae

main is liye kanTe bo raha hun

jag bit chuke magar abhi tak

KHud apni talash mein laga hun

kaun us ko sune siwae mere

main apni shikast ki sada hun

har shaKHs mujh ko dekhta hai

duniya bhar ka main majra hun

koi to mile KHushi ka sathi

aaine mein muskura raha hun

hai chashm-ba-rah kaun mera

yarab main kis ka aasra hun

jab dekhiye jal raha hun 'arshi'

kya main kisi lakh ka diya hun