پہنچ کر میکدے کے در پہ یوں آئی ہنسی مجھ کو

پہنچ کر میکدے کے در پہ یوں آئی ہنسی مجھ کو

کہ لے آئی کہاں آخر یہ میری تشنگی مجھ کو

بہت سوچا ہے لیکن یہ نہیں سمجھا کہ آخر کیوں

اندھیروں میں لئے پھرتی ہے اکثر روشنی مجھ کو

رہ الفت میں سمجھاتے رہے اک دوسرے کو ہم

کبھی دیوانگی کو میں کبھی دیوانگی مجھ کو

تجھے اے گردش دوراں لگا لیتا گلے لیکن

سنبھلنے ہی نہیں دیتی ہے میری بے خودی مجھ کو

میں ہر اک راہرو سے پوچھتا ہوں راہ منزل کی

مجھے ڈر ہے کہ لے ڈوبے گی میری سادگی مجھ کو

ابھی تو زخم کھائے ہیں ابھی تو دل ہی ٹوٹا ہے

خدا جانے ابھی کیا کیا دکھائے دل لگی مجھ کو

ہوئی مدت سکون دل کنولؔ جاتا رہا اپنا

بہت مہنگی پڑی ہے زندگی سے دوستی مجھ کو