pahunch kar mai-kade ke dar pe yun aai hansi mujhko

pahuñch kar mai-kade ke dar pe yuuñ aa.ī hañsī mujh ko

ki le aa.ī kahāñ āḳhir ye merī tishnagī mujh ko

bahut sochā hai lekin ye nahīñ samjhā ki āḳhir kyoñ

añdheroñ meñ liye phirtī hai aksar raushnī mujh ko

rah-e-ulfat meñ samjhāte rahe ik dūsre ko ham

kabhī dīvāngī ko maiñ kabhī dīvāngī mujh ko

tujhe ai gardish-e-daurāñ lagā letā gale lekin

sañbhalne hī nahīñ detī hai merī be-ḳhudī mujh ko

maiñ har ik rāh-rau se pūchhtā huuñ raah manzil kī

mujhe Dar hai ki le Dūbegī merī sādgī mujh ko

abhī to zaḳhm khaa.e haiñ abhī to dil hī TuuTā hai

ḳhudā jaane abhī kyā kyā dikhā.e dil-lagī mujh ko

huī muddat sukūn-e-dil 'kañval' jaatā rahā apnā

bahut mahñgī paḌī hai zindagī se dostī mujh ko

pahunch kar mai-kade ke dar pe yun aai hansi mujh ko

ki le aai kahan aaKHir ye meri tishnagi mujh ko

bahut socha hai lekin ye nahin samjha ki aaKHir kyon

andheron mein liye phirti hai aksar raushni mujh ko

rah-e-ulfat mein samjhate rahe ek dusre ko hum

kabhi diwangi ko main kabhi diwangi mujh ko

tujhe ai gardish-e-dauran laga leta gale lekin

sanbhalne hi nahin deti hai meri be-KHudi mujh ko

main har ek rah-rau se puchhta hun rah manzil ki

mujhe Dar hai ki le Dubegi meri sadgi mujh ko

abhi to zaKHm khae hain abhi to dil hi TuTa hai

KHuda jaane abhi kya kya dikhae dil-lagi mujh ko

hui muddat sukun-e-dil 'kanwal' jata raha apna

bahut mahngi paDi hai zindagi se dosti mujh ko