pahunchi na dil ki baat hudud-e-payam tak

pahūñchī na dil kī baat hudūd-e-payām tak

baaqī haiñ un pe kitne javāb-e-salām tak

but-ḳhāna-sāz rang-e-zamāna hai kis qadar

chhoḌā na us ne kā'ba-e-ālī-maqām tak

mānūs ho rahe haiñ tirī jalva-gāh se

pahoñche abhī haiñ manzil-e-māh-e-tamām tak

jab tak rahe vo merī nigāhoñ ke sāmne

Thahrī na ek ruḳh se adā-e-ḳhirām tak

dil de ke un ko aap se aise guzar ga.e

jaise ki ham the sirf isī intizām tak

anjām-e-kār shab ke añdhere meñ luT gayā

rakkhā thā kaif-e-sub.h bachā kar jo shaam tak

is tarah kar rahe haiñ 'razā' kā vo tazkira

ḳhālī nahīñ hai tanz se husn-e-kalām tak

pahunchi na dil ki baat hudud-e-payam tak

baqi hain un pe kitne jawab-e-salam tak

but-KHana-saz rang-e-zamana hai kis qadar

chhoDa na us ne ka'ba-e-ali-maqam tak

manus ho rahe hain teri jalwa-gah se

pahonche abhi hain manzil-e-mah-e-tamam tak

jab tak rahe wo meri nigahon ke samne

Thahri na ek ruKH se ada-e-KHiram tak

dil de ke un ko aap se aise guzar gae

jaise ki hum the sirf isi intizam tak

anjam-e-kar shab ke andhere mein luT gaya

rakkha tha kaif-e-subh bacha kar jo sham tak

is tarah kar rahe hain 'raza' ka wo tazkira

KHali nahin hai tanz se husn-e-kalam tak