paigham-e-shabab aa raha hai

paiġhām-e-shabāb aa rahā hai

shāḳhoñ pe gulāb aa rahā hai

jazbe kā parinda kyuuñ na taḌpe

rāhoñ meñ sarāb aa rahā hai

hoshyār rahe ḳhirad kī mahfil

ik ḳhāna-ḳharāb aa rahā hai

sarshār haiñ vaqt ke kaTore

jām-e-mai-e-nāb aa rahā hai

is tarah shafaq ko niiñd aa.ī

ehsās ko ḳhvāb aa rahā hai

insān hai be-hayā kuchh aisā

haivāñ ko hijāb aa rahā hai

tāroñ kī nigāh kyuuñ na chamke

chehre pe naqāb aa rahā hai

korā hai ye hāshiya ḳhudī kā

hastī kā vo baab aa rahā hai

uñglī meñ ubhar rahī hai sozish

hāthoñ meñ rubāb aa rahā hai

pūchhā jo savāl āsmāñ se

dhartī se javāb aa rahā hai

ghultā hai dimāġh ai 'karāmat'

sar par jo azaab aa rahā hai

paigham-e-shabab aa raha hai

shaKHon pe gulab aa raha hai

jazbe ka parinda kyun na taDpe

rahon mein sarab aa raha hai

hoshyar rahe KHirad ki mahfil

ek KHana-KHarab aa raha hai

sarshaar hain waqt ke kaTore

jam-e-mai-e-nab aa raha hai

is tarah shafaq ko nind aai

ehsas ko KHwab aa raha hai

insan hai be-haya kuchh aisa

haiwan ko hijab aa raha hai

taron ki nigah kyun na chamke

chehre pe naqab aa raha hai

kora hai ye hashiya KHudi ka

hasti ka wo bab aa raha hai

ungli mein ubhar rahi hai sozish

hathon mein rubab aa raha hai

puchha jo sawal aasman se

dharti se jawab aa raha hai

ghulta hai dimagh ai 'karamat'

sar par jo azab aa raha hai