paiham talash-e-dost main karta chala gaya

paiham talāsh-e-dost maiñ kartā chalā gayā

kaunain kī hadoñ se guzartā chalā gayā

jitnā mazāq-e-ishq sañvartā chalā gayā

rañg-e-tabī.at aur nikhartā chalā gayā

ik sañg-dil kī dīda-dilerī to dekhnā

shikvoñ kā e'tirāf bhī kartā chalā gayā

be-chārgī to dekhiye majbūr-e-shauq kī

tohmat muqaddarāt pe dhartā chalā gayā

dete rahe fareb-e-musarrat vo pai-ba-pai

maiñ ġham kī manziloñ se guzartā chalā gayā

tasvīr-e-yās-o-ġham thī ba-zāhir nihāñ magar

har naqsh dil hī dil meñ ubhartā chalā gayā

dil mahv-e-iztirāb nazar sākit-o-ḳhamosh

ye kaun sāmne se guzartā chalā gayā

paiham talash-e-dost main karta chala gaya

kaunain ki hadon se guzarta chala gaya

jitna mazaq-e-ishq sanwarta chala gaya

rang-e-tabiat aur nikharta chala gaya

ek sang-dil ki dida-dileri to dekhna

shikwon ka e'tiraf bhi karta chala gaya

be-chaargi to dekhiye majbur-e-shauq ki

tohmat muqaddaraat pe dharta chala gaya

dete rahe fareb-e-musarrat wo pai-ba-pai

main gham ki manzilon se guzarta chala gaya

taswir-e-yas-o-gham thi ba-zahir nihan magar

har naqsh dil hi dil mein ubharta chala gaya

dil mahw-e-iztirab nazar sakit-o-KHamosh

ye kaun samne se guzarta chala gaya